Udwch ar y lleuad a llamu’n wyllt gyda’ch cnud,
Carlamwch i’r coed, troi’ch cefn ar y byd
Anturiwch heb wybod pa beth sy’n eich aros,
Trwy goedwigoedd dychymyg i’n cartref bach clòs.
Mae Blaidd yn brofiad theatr aml-synhwyraidd dwyieithog i blant dan 5 oed a’u teuluoedd. Mae’n canolbwyntio ar adrodd straeon, iaith ac ail-wylltio ein hunain. Mae’r cynhyrchiad hwn yn plethu’n ddi-dor rhwng y Gymraeg a’r Saesneg. Perffaith ar gyfer pobl nad ydynt yn siaradwyr Cymraeg, siaradwyr Cymraeg rhugl a dysgwyr Cymraeg ac mae’n wych ar gyfer meddyliau ifanc.
Mae Blaidd yn dilyn stori blaidd wrth iddo deithio drwy ei famwlad, gan ddod ar draws creaduriaid chwedlonol a mynd ar drywydd eu hamgylchoedd. Gan grewyr Ned and the Whale a How to Defeat Monsters (And Get Away With It), paratowch i gael eich swyno gan y profiad theatrig hudolus hwn a fydd yn eich gadael yn udo am fwy!
Ar ôl y sioe, beth am aros am fwy o hwyl yng nghoedwig Blaidd, wrth i ni greu crefftau y gallwch chi fynd â nhw adref ar gyfer eich anturiaethau eich hun?
Disgwyliwch chwerthin, adenydd sigledig, tirweddau sain meddal ac opsiynau o grefftau sy’n addas ar gyfer pob anturiaethwr bach (a’u hoedolion!).
